Ársfundur ÆSKR fór fram í Grensáskirkju þirðjudaginn 16. apríl. Fundurinn hófst með helgistund í kirkjunni í umsjá sr. Ólafs Jóhannssonar. Að helgistundinni lokinni hófust hefðbundin ársfundarstörf þar sem Dagný Halla Tómasdóttir starfsmaður ÆSKR kynnti ársskýrslu starfsársins og Jónína Sif Eyþórsdóttir formaður ÆSKR kynnti drög að fjárhagsáætlun fyrir árið 2014 sem fer síðan til samþykktar hjá héraðsnefndum og héraðsfundum prófastsdæmanna.

Um leið og ársskýrslan var kynnt fengu fundarmenn blöð í hendurnar til að skrifa niður hugmyndir að starfi ÆSKR fyrir næsta starfsár og komu margar góðar hugmyndir fram. Nýtt æskulýðsráð mun síðan vinna úr hugmyndunum við mótun dagskrár næsta vetrar.

Kosið var í nýtt æskulýðsráð og fengu Anna Arnardóttir frá Grafarvogskirkju, Hjörtur Freyr Sæland frá Digraneskirkju og Berglind Ólafsdóttir frá Seljakirkju kosingu sem aðalmenn til tveggja ára og Katrín Helga Ágústdsóttir frá Neskirkju og Gunnar Óli Markússon frá Neskirkju voru kosin varamenn til eins árs. Fyrir í ráðinu voru Jónína Sif Eyþórsdóttir frá Hjallakirkju og Sunna Björg Gunnarsdóttir frá Seljakirkju.

Á fundinum var einnig valið í mótsnefnd, menntanefnd, haustviðburðarnefnd og skemmtinefnd leiðtoga.

Góð stemning var á fundinum og hugur í fólki. Það stefnir því all í það að félögin geti átt von á öflugu starfi hjá ÆSKR á næsta starfsári.

Frábært söngmót í Vatnaskógi á vegum Skógarmanna og æskulýðsnefndar Kjalarnessprófastsdæmis.

Finnst þér gaman að syngja?  Finnst þér gott að sitja við arineldinn og syngja falleg lög?  Finnst þér gaman að syngja með öðrum krökkum?

Þá er Söngmótið í Vatnaskógi 12.-14. apríl rétti staðurinn fyrir þig.  Opið öllum unglingum í 8.-10. bekk sem hafa gaman af því að syngja.

-       Mikill söngur, fjörug lög, róleg lög, einfaldar raddanir.

-       Frjáls tími, íþróttahús, útivera, spjall, hasar, rólegheit.

-       Kvöldvökur, hugvekjur, gleði, gaman.

Rúta frá Holtavegi 28 (hús KFUM og K) föstudaginn 12. apríl kl. 18.00.  Rúta frá Sandgerði kl. 16.00.  Heimkoma til Reykjavíkur áætluð kl. 15.00 sunnudaginn 14. apríl og kl. 16 í Garð og Sandgerði. Almennt verð er kr. 9.000 fyrir utan rútu. Allur matur innifalinn. Á mótið geta komið einstök félög eða hópar með sínum leiðtoga en einnig er hægt að skrá sig sem einstakling líkt og þegar maður skrárir sig í sumarbúðir.  Starfsmenn Vatnaskógar bera þá ábyrgð á viðkomandi.

Móttsstjóri og ábyrgðarmaður er sr. Sigurður Grétar Sigurðsson og sér hann um að láta alla syngja af lífs og sálar kröftum.

Skráning og nánari upplýsingar á netfangi: srsgs@simnet.is eða hjá Sigurði Grétari í s. 895-2243.  Lausleg skráning fyrir 22. mars en lokaskráning og greiðsla miðast við 5. apríl.

Æskulýðsnefnd Kjalarnesprófastsdæmis

Skógarmenn KFUM

Um 230 unglingar og leiðtogar þeirra áttu saman frábæra helgi í Vatnaskógi á febrúarmóti ÆSKR 2013. Eins og venja er á þessum mótum var stemningin frábær. Skemmtilegar kvöldvökur og ýmiskonar fjölbreytt verkefni. Þá var að sjálfsögðu spurningakeppni ÆSKR á sínum stað og í ár voru það NEDÓingar sem stóðu uppi sem sigurvegarar. Þá sigraði MeMe junior, yngra félagið frá Digraneskirkju hæfileikakeppnina með myndbandi og söng sem gladdi bæði augu,eyru og hjarta. Sérstakt mótslag sem bar sama heiti og yfirskrift mótsins, Ég um mig frá mér til þín https://soundcloud.com/larusoskarsigmundsson/eg-um-mig-fra-mer-til-thin var spilað við hvert tækifæri og hlaut góðar undirtektir.

ÆSKR þakkar mótsstjórunum, leiðtogum, þátttakendum og starfsfólkinu í Vatnaskógi fyrir frábæra helgi!